Isaiah 40

Abantu bakaNkulunkulu bayaduduzwa

1Duduzani, liduduze abantu bami ^a, utsho uNkulunkulu wenu. 2Khulumani kunhliziyo yeJerusalema, limemeze kuyo ukuthi imfazo yayo iphelelisiwe, ukuthi ububi bayo buthethelelwe, ngoba yemukele esandleni seNkosi okuphindwe kabili ngazo zonke izono zayo ^b.

3Ilizwi lomemezayo ehlane ^clithi: Lungisani indlela yeNkosi ^d, lenzele uNkulunkulu wethu umgwaqo omkhulu ^e oqondileyo enkangala. 4Sonke isigodi sizaphakanyiswa ^f, layo yonke intaba loqaqa kuzakwehliswa ^g; lokugobileyo ^h kuzakwenziwa kuqonde, lendawo ezimaxhakaxhaka zibe ligceke. 5Inkazimulo ⁱ yeNkosi izabonakaliswa, layo yonke inyama ^j iyibone kanyekanye, ngoba umlomo weNkosi ukhulumile ^k. 6Ilizwi lathi: Memeza! Wasesithi: Ngizamemeza ngithini? Yonke inyama ^l ibutshani ^{m , n}, labo bonke ubuhle bayo bunjengeluba leganga ^{o , p}. 7Utshani buyabuna ^{q , r}, iluba liyawohloka ^s, ngoba uMoya weNkosi ^t uphephetha kukho; isibili abantu ^u babutshani ^v. 8Utshani buyabuna, iluba liyawohloka ^w; kodwa ^x ilizwi likaNkulunkulu wethu limi kuze kube nini lanini ^y.

9Wena Ziyoni, oletha izindaba ezinhle, khwela entabeni ende; wena Jerusalema, oletha izindaba ezinhle, phakamisa ilizwi lakho ngamandla, liphakamise ungesabi; tshono emizini yakoJuda uthi: Khangelani, uNkulunkulu wenu. 10Khangela, iNkosi uJehova izakuza ngamandla ^z, lengalo yayo izayibusela ^aa; khangela ^ab, umvuzo wayo ilawo, lenkokhelo yayo iphambi kwayo ^ac. 11Izakwelusa umhlambi wayo njengomelusi ^{ad , ae}, izabutha ^af amawundlu ^ag ngengalo yayo, iwathwale esifubeni sayo ^ah, ikhokhele kuhle ^ai ezimunyisayo.

Ngubani onjengoNkulunkulu?

12Ngubani olinganise amanzi ^aj entendeni yesandla sakhe, walinganisa amazulu ^ak ngeminwe eyeluliweyo, wahlanganisa uthuli lomhlaba esilinganisweni, walinganisa izintaba ngesikali ^al, lamaqaqa ngesilinganiso ^am? 13Ngubani ^an oqondise uMoya weNkosi ^ao, kumbe wamfundisa engumeluleki wakhe? 14Yelulekane lobani, owayenza yaqedisisa, wayifundisa endleleni yesahlulelo, wayifundisa ulwazi ^ap, wayazisa indlela yokuqedisisa? 15Khangela, izizwe zinjengethonsi lenkonxa, zibalwa njengothuli lwesikali. Khangela, uphakamisa izihlenge ^aq njengento encinyane kakhulu ^ar. 16LeLebhanoni kayeneli ukutsha ^as, lenyamazana ^at zayo kazeneli umnikelo wokutshiswa. 17Zonke izizwe zinjengezingasilutho ^{au , av} phambi kwayo, zibalwa ^aw kuyo zincinyane kulokungelutho ^ax lokuyize ^ay.

18Pho, lizamfananisa lobani uNkulunkulu ^az, loba mfanekiso bani elizamlinganisa lawo? 19Ingcitshi incibilikisa isithombe esibaziweyo ^ba, lomkhandi wegolide ^bb uyasinameka ngegolide ^bc, abumbe ngokuncibilikisa amaketane esiliva. 20Lowo ongumyanga ongelamnikelo ukhetha isihlahla esingaboliyo, azidingele umbazi oyingcitshi ukuze alungise isithombe esingayikunyikinywa ^bd.

21Kalazi yini ^be? Kalizwanga yini? Kalitshelwanga yini kwasekuqaleni? Kaliqedisisanga yini kwasekusekelweni komhlaba ^bf? 22Kunguye ohlala phezu kwesigombolozi somhlaba ^bg, labahlali bawo banjengentethe ^bh; owendlala amazulu ^bi njengekhetheni ^bj, awelule njengethente lokuhlala; 23owenza iziphathamandla ^bk zingabi yilutho ^bl, enze abehluleli bomhlaba babe njengeze ^bm. 24Yebo, kabayikugxunyekwa; yebo, kabayikuhlanyelwa; yebo, isiqu sabo kasiyikugxila emhlabathini ^bn; laye uzaphephetha phezu kwabo, babune; lesivunguzane sibasuse njengamabibi ^bo.

25Pho, lizangifananisa lobani ^{bp , bq}, engizafanana laye ^br? kutsho oNgcwele. 26Phakamiselani amehlo enu phezulu ^bs, libone odale lezizinto; okhipha ibutho lazo ngenani ^bt; azibize zonke ngamabizo ^bu ngobukhulu bamandla akhe ^bv, ngoba eqinile emandleni; kayikho leyodwa esilelayo ^bw.

27Utsholoni, wena Jakobe, ukhulume, wena Israyeli ukuthi: Indlela yami isithekile eNkosini ^bx lesahlulelo sami ^by sedlulisiwe nguNkulunkulu wami? 28Kawazi yini ^bz, kawukezwa yini ^ca? UNkulunkulu olaphakade, iNkosi, uMdali wemikhawulo yomhlaba kapheli amandla njalo kadinwa? Kakuphenyeki ukuqedisisa kwakhe ^{cb , cc}. 29Inika abadangeleyo amandla, lakwabangaqinanga yandisa amandla. 30Labatsha bazaphelelwa ngamandla, badinwe, lamajaha azakuwa lokuwa; 31kodwa abalindela iNkosi bazavuselela amandla ^{cd , ce}; bazaqonga ngempiko njengenkozi ^{cf , cg}, bagijime bangadinwa, bahambe bangapheli amandla.